Cristiano Ronaldo amesema kuwa Al Nassr “pengine” itakuwa klabu yake ya mwisho kabla ya kustaafu.

Mchezaji huyo wa kimataifa wa Ureno, 39, alijiunga na timu ya Saudi Pro League Januari 2023 baada ya kuondoka Manchester United.

Alikuwa akihusishwa na kurejea Sporting Lisbon, ambako alianza kazi yake.

Lakini alikiambia kituo cha TV cha Ureno Now: “Sijui kama nitastaafu hivi karibuni, baada ya miaka miwili au mitatu, lakini pengine nitastaafu hapa Al Nassr.

“Nina furaha katika klabu hii, najisikia vizuri katika nchi hii pia. Nina furaha kucheza Saudi Arabia na ninataka kuendelea.”

Mshambulizi huyo wa zamani wa Real Madrid na Juventus amefunga mabao 898 katika maisha yake ya soka, huku 130 kati ya mabao hayo akiichezea Ureno na anataka kuongeza idadi hiyo huku akithibitisha kuwa anataka kuendelea na soka lake la kimataifa.

“Ninapoondoka kwenye timu ya taifa, sitamwambia mtu yeyote mapema na itakuwa uamuzi wa papo hapo kwa upande wangu, lakini pia uamuzi uliofikiriwa vizuri,” aliongeza.

“Kwa sasa ninachotaka ni kuweza kuisaidia timu ya taifa katika mechi zao zijazo.

“Tuna Ligi ya Mataifa mbele yetu na ningependa sana kucheza.”

Ureno itaikaribisha Croatia tarehe 5 Septemba na Scotland siku tatu baadaye kabla ya kuzuru Poland tarehe 12 Oktoba na Scotland tarehe 15 Oktoba.

Ronaldo, ambaye anasema wazo la kuwa meneja mara tu atakapostaafu “hata haliingii akilini mwangu”, pia anatazamiwa kupokea tuzo maalum kutoka kwa rais wa Uefa Aleksander Ceferin kuashiria mafanikio yake katika Ligi ya Mabingwa.

Akiwa na mabao 140 katika mechi 183, mshindi huyo wa tuzo ya Ballon d’Or mara sita ndiye mfungaji bora wa muda wote katika mashindano hayo, 11 mbele ya Lionel Messi na 46 mbele ya mshambuliaji wa Barcelona Robert Lewandowski katika nafasi ya tatu.

Pia ameshinda Ligi ya Mabingwa mara tano, mara moja akiwa na Manchester United na mara nne akiwa na Real Madrid.